部門分散‧浪費公帑

過咗中秋，又有衙門「搬竇」，「財神」與「工頭」，「拍拖」上新樓，祠堂開檔後，大小多衙門，自己唔做「竇」，卻要租貴樓，不單嘥銀兩，官威被剃頭，皆因衙門上，竟有「鳳姐樓」。老爺與嫖客，同時上落樓，睇到真「該燴」，敢問何解救!？ 近年祠堂，人丁「興旺」，好似魚乸散「春」，衙門增完一樓又一樓，本來太公，亦係最大土地公，「家族繁衍」理應順勢，增屋建樓，況且太公，銀兩多到唔使憂。 但好出奇，廟祝自用地，卻又唔捨得，賤價批私商，咁就好爽手，收番雞碎錢，天價租私樓。但又樓唔夠。甚至大法師，氣頂鬧出口，千辛又萬苦，操出新法師，法壇憂吾夠！ 高入正哥鬧，祠堂租私樓，個個月嘥銀，三千幾萬兩，嘥一年租金，幾可起大樓。嘥錢仲其次，衙門多分散，溝通唔就手，祠堂有陋習，文件常旅遊，遊遍多衙門，搞到信差哥，有氣冇時抖，星斗嘅蟻民，四處去「入稟」，全城到處走，更加走到擝。 嘥錢唔打緊，顏面受損真，因為租私樓，非衙門專利，鳳姐權均等。蓮花地衙門，同幢樓之上，竟有設鳳樓。嫖客頻上落，經常咁鬼「啱」，狹路頻相逢，與大小老爺，甚至靚官姐，迫做「同路人」，令老爺「氣谷」。顏面好鬼醜！ 口痕友發問，祠堂咁多銀，土地隨便用，都唔學桂枝，起幢大衙樓，寧願嘥銀兩，去租貴私樓，將衙門分散。嘥錢增麻煩，唔通只喺為，唔想「民主昌」，抑或「大炮新」，鬧得咁方便！？若果真言中，真阿茂整餅！                       ‧阿 茂‧