深深深

深深深

「高潮迭起！」呢句唔係偵探小說號情節或係康城電影節上映緊嘅國際大片。而係形容蓮花地月來水浸水位嘅深度！ 半個月前，蓮花地暴雨，睇天衙門又災情殺到方「預報」打鑼，搞到蟻民唔知佢「搞笑」還係「嚟真」？「議事亭」管嗰啲泵房同坑渠，又咁啱「運作不力」同塞死。搞到水浸「眼眉」，損失慘重。 開「追悼會」嗰果陣，蟻民睇到嘅係各大衙門嘅老爺又係「三度板斧」，除咗誓神礕願話要「深入研究」，又拿拿聲搖身卸膊，更進一步狂插同僚。蟻民睇到嘅最大表現就係耍太極、急卸責同狂互插，父老睇過表演，恍然大悟，人禍加重咗「天災」！ 經過十幾日補鑊，日昨暴雨又落，舊患未除，新災又起，結果，災情又「高潮疊起」。 口口聲聲話已經做好咗渠務及排水準備嘅老爺，面對「重大鑊」，今次學「精」咗。 「賴天」！三十年一遇嘅大雨呀！好勁呀！ 老災區嘅關閘地下巴士總，又見地下汪洋，連見慣大鑊嘢嘅「大聲公」老總，報料番公仔箱嗰陣，激動到大呼「水好深呀！」 點解咁「深」？時聞仔報料，方天下大白，咁大個巴士停車場，只有兩個水泵，但係一個長期壞咗，連口聲聲話做好預防設施嘅衙門都唔理，「唔浸到好深」，先係新聞！你話係「天災」?還係人禍！？                                                  ‧阿茂‧